BUTUAN CITY – Nakumpirmang usa diay ka CAFGU member sa 29th Infantry Battalion, Philippine Army ang napalgang patay’ng lawas sa usa ka lalaki kagahapon sa alas-nueve sa buntag sa bukirang bahin sa P-6, Sitio Imelda, Brgy. Antongalon ning siyudad sa Butuan.
Naila ang biktimang si Elias Bangcot, ulitawo, residente sa Sitio Zigzag, Brgy. Anticala ug nadestino sa Mahayahay Patrol Base, Delta Company sa susamang barangay nga sakop ning siyudad.
Migawas sa imbestigasyon sa mga sakop sa Butuan City Police Station 4 nga ning mi-aging Miyerkules sa alas-3:40 sa hapon, nadunggan sa mga residente ang tulo ka mga buto sa armas.
Kagahapon sa buntag na napalgan ang patay’ng lawas niini sa mag-uumang si Francisco Docdoc Bambisa, 74-anyos dihang padulong na siya sa iyang payag aron mamahog sa iyang mga binuhing kahayupan.
Gibinaklid pa ang mga kamot niini gamit ang liston samtang giba-atan ang ba-ba og puti nga tela ug gi-blindfold ang mga mata.
Narekober sa dapit nga nahitabuan ang gitira nang cartridge sa kalibre punto-45 nga pistola kondiin naka-angkon og tulo ka mga samad-pinusilan sa lawas ang biktima.
