BUTUAN CITY – Gipadayon sa lokal nga panggamhanan sa syudad sa Cabadbaran ang pagpanghatag og tagsa ka sakong bugas humay ngadto sa kada-balay human ang unang pagpang-apod apod niini niadtong Abril 24.

Ang mga benepisyaryo mao kadtong mga pamilyang wala ma-apil sa Social Amelioration Program kon SAP sa nasudnong kagamhanan ug kadtong dili membro sa Pantawid sa Pamilya ng Pilipino Program kon 4Ps.

Kini isip ayuda sa lokal nga kagamhanan pagpanguna ni Mayor Judy Amante ug sa Sangguniang Panlungsod pagpanguna usab ni Vice Mayor Rey Jamboy ngadto sa katawhan ning panahon sa krisis nga hatud sa COVID-19.

Sa maong kalihukan, mi-abot sa 569 ka mga panimalay ang nakadawat sa maong ayuda kondiin sa kada-barangay, ang mga barangay kapitan maoy nanguna paghatud niini ngadto sa kada-balay sa ilang mga residente.

Ipadayon ang pagpanghatag sa mga mosunod nga adlaw ngadto sa mga panimalay sa ubang barangay nga wala pa nahatagan niini.