BUTUAN CITY – Padayon ang imbestigasyon sa kapulisan sa San Francisco, Agusan del Sur sa nahitabong pagpamusil-patay kagahapon sa alas 12:00 sa udto sa Brgy. Bayugan 2, nga miresulta sa pagkamatay sa magti-ayong sakay sa ilang motorsiklo.

Naila ang mga biktimang sila Crispin Orlandez ug asawa niining si Zebrean Orlandez, pulos residente sa Purok 1, Brgy. Poblacion, lungsod sa Rosario, sa susamang lalawigan.

Base sa asuy sa mga lumolupyo sa maong dapit, nakadungog na lang sila ug duha ka mga buto-buto sa armas hangtud nga ila na lang nakitang nagbuy-od na ang duha tapad sa ilang motorsiklo.

Blangko pa ang mga ginsakpan sa San Francisco Municipal Police Station sa motibo ug identity sa suspetsado tungod kay mingaw man ang dapit nga nahitabuan ug wala’y nakakita kung kinsa ang mitiro kanila.