BUTUAN CITY – Dako ang pagpasalamat sa overseas Filipino worker kon OFW nga hingpit na siyang naka-uli sa Marinduque gikan sa Saudi Arabia sa tabang sa Bombo Radyo Butuan.
Emosyunal si Roxanne Dohilag Pujeda dihang nahinabi ning sibyahan nga sa katapusan, naka-uli na siya human nakasibat gikan abusado niyang amo nga misulay paglugos kaniya.
Gibutyag ni Pujeda nga bisan og wala siya’y dala sa iyang pagpa-uli, nalipay gihapon ang iyang mga kabanay nga luwas siyang nakapa-uli.
Sa tulo ka adlaw matud pa niyang biyahe, kamulo siya og hilak tungod sa kasakit sa iyang kamot nga nabali sa pagdepensa sa iyang kaugalingon aron lang dili mapahimuslan sa iyang amo gawas nga gihilantan pa siya.
Iya pang gipa-abot ang nahabilin niyang 28 ka adlaw nga sweldo nga ipadala matud pa sa iyang agency aron magamit sa pagpa-check up og pagpatambal sa iyang nabali nga kamot.
Tumang pagpasalamat ang kanunay niyang gibungat tungod sa pagtabang sa Bombo Radyo aron ma-facilitate ang luwas niyang pagpa-uli sa Pilipinas.
Samtang hugot usab ang pagpasalamat sa inahan ni Roxanne Pujeda nga si Leonila Dohilag sa luwas niyang pagpa-uli sa nasud ilabina nga dako ang iyang gibating kabalaka dihang wala na niya ma-contact ang iyang anak bisan niadtong atua pa kini sa Saudi Arabia.
Kung siya matud pa ang pabut-on, dili na siya gustong mu-abroad pa ang iyang anak ilabina nga edaran na siya ug wala usab siya’y tarong nga tulog.
