BUTUAN CITY – Nakuhaan og armas og gidudahang shabu sa mga sakop sa Butuan City Police Station 2 ang usa ka notoryus nga gang leader sa grupong ‘Wabad’ nga nalambigit sa sunod-sunod nga pagpangawat, pagpanulis, gang riots og pagpang-harass sa mga estudyante ning siyudad.

Atol kini sa gilusad nga police operation pasado alas-3:40 sa kaadlawon sa P-3, Barangay Doongan ning siyudad.

Nakuha gikan sa suspek nga si Rowel Abogadi alias ‘Tawe’, residente sa P-1 Barangay Holy Redeemer ning siyudad ang pipila ka sachet sa suspected shabu og wala marehistro nga kalibre .38 nga revolver uban sa tulo ka mga buhing bala.

Sigon ni BCPS2 commander Police Capt. Romeo Sentinta Jr., ang pagka-aresto sa maong gang leader maghatag og klarong mensahe ngadto sa tanang mga gang members ning siyudad nga hunungon na ang bisan unsa mang kagubot og pahimangno na usab matud pa kini ngadto sa tanang mga tigpayuhot og ginadiling druga nga wala’y hunong ang kapulisan sa pagsanta sa mga dautang kalihukan og pagsikop sa mga kriminal.