BUTUAN CITY – Sa tumong nga makabantay matud pa ang iyang mga silingan, midangop ning sibyahan ang usa ka ulitawo aron ipahibalo ang pagbarang matud pa sa pipila niya ka mga silingan ngadto kaniya.
Sigon ni Ernesto Caluña, 37-anyos og residente sa Purok 3, Brgy. Mahogany ning siyudad sa Butuan, nagsugod matud pa ang tanan niadtong tuig 2015 dihang wala siya misugot sa pagdani sa iyang mga silingan nga mu-apil sa ilang kulto nga karon duna’y pito ka mga membro.
Dinhi na matud pa siya makasinati nga duna’y dili makitang binuhat nga mutuklod kaniya diha sa iyang tangkugo pa-ubos sa iyang likod nga usahay mutuok pa kaniya.
Tungod kay dili makita ang pwersa nga nabati niyang daw kalag matud pa, mudu-ot pa sa iyang panit ang iyang kuko aron lang matangtang gikan sa iyang tangkugo pa-ubos sa iyang likod ang dili makitang mga kamot.
Mi-abot matud pa ang higayon nga naala-an pa siya nga nakabaton og deperensya sa pangisip o kaha wala lama’y kaon tungod sa maong hitabo.
Naka-undang usab matud pa siya sa iyang trabaho tungod kay mu-atake kaniya ang dili makitang linalang bisan unsang orasa og bisan na sa iyang pagtrabaho rason nga midangop na siya sa ilang barangay office og sa police station apan wala’y mutuo kaniya.
Dinhi na siya nagdesisyong magpalayo na lang sa ilang lugar og dinhi niya nabati nga wala na siya gi-atake.
Nakahuna-huna siya pagdangop ning sibyahan aron matud pa magbantay ang iyang mga silingan batuk sa maong mga indibidwal tungod kay gihimo matud pa nila kining panapi sa rasong sila lamang usab matud pa ang mutambal sa ilang pangbarangon.
