BUTUAN CITY – Gipanghimakak sa kasundaluhan sa Sudan nga mihimo sila og pag-atake sa dakong hospital sa siyudad sa kasadpang bahin sa nasud nga gihawiran sa ilang kalaban nga paramilitary Rapid Support Forces (RSF).
Una nang gibutyag sa nangulo sa World Health Organization (WHO) nga 64 katawo lakip na ang 13 ka mga bata, duha ka nurses og usa ka doctor ang napatay sa pag-atake sa el-Daein Teaching Hospital samtang dunay 89 usab ang angol.
Base sa post ni Tedros Adhanom Ghebreyesus, hepe sa World Health Organization, gi-awhag niini ang duha ka panig nga undangon na ang kagubot nga gisugdan tulo ka tuig na ang nakalabay.
Sumala sa Rapid Support Forces nga usa ka army drone ang miigo sa hospital sa el-Daein, sa Darfur state, niadtong adlaw diin ang mga Muslims nagsaulog sa pagtapos sa Ramadan.
Ang maong pag-atake miguba sa top floor sa ospital, nakaguba pag-ayo sa accident og emergency department lakip na sa mga importanteng medical equipment.
Sigon ni Dr Tedros, nga ang el-Daein Teaching Hospital wala na nagamit human sa pag-atake dayung pagkondena sa mga pag-atake nga target ang medical nga pasilidad.
Apan depensa pa sa military nga gipasangenlan lang sila dayung butyag nga nagsunod sila sa international nga balaod og patakaran.
Tungod niini, nanawagan ang Emergency Lawyers group og independent ingon man transparent investigation aron kadtong mga responsable mapahamtangan og silot.
