BUTUAN CITY – Padayon pang gi-imbestigahan sa kapulisan sa Malungon, Sarangani Province ang pagkahulog sa usa ka kotse sa pangpang sa Purok Malakas, Brgy. Nagpan kagahapon sa alas-3:50 sa hapon nga miresulta sa kamatayon sa 6 ka mga tawo, aron masuta ang hinungdan niini.
Gi-ila ni Police Lt. Col. Giovanni Ladeo, Hepe sa Malungon Municipal Police station ang mga biktima nga sila Jay Tabanag Mandawan, 34-anyos, driver sa sakyanan; Quiruben Saradoma Luchavez, 39-anyos; Nora Albuena Pellejo, 59-anyos; American national nga si Ernesto Xicay Mucia, 57 samtang padayon pang gi-ila ang laing duha ka mga biktima.
Nasayrang gikan matud pa sa General Santos City ang sakyanang gimanehuan ni Mandwan ug padulong unta sa Mati, Davao Oriental apan pag-abot sa bahada nga bahin sa Barangay Nagpan, mi-overtake kini sa laing sakyanan gamit ang outer lane rason nga na-overshoot kini sa kurbada nga bahin hinungdan sa pagsirko niini sa pila ka higayon hangtud nga nahulog sa pangpang.
Nadala pa sa Malungon Municipal Hospital ang mga biktima apan gideklara nga dead on arrival.
