BUTUAN CITY- Patay ang unom katao lakip ang suspek sa multiple stabbling incident nga nahitabo sa shopping centre sa Sydney, Australia.
Nahitabo ang nasangpit nga pagpangluba bandang alas una ang takna sa hapon kagahapon, oras sa Pilipinas. Sumala sa mga nakasaksi nga kalit na lamang nanunggab sa mga tawo ang usa ka lalaki nga dunay gunit nga kutsilyo.
Nahunong lamang ang pagpangluba sa nasangpit nga lalaki human nga daling nakaresponde sa maong panghitabo ang usa ka babayeng Pulis nga naka destino sa nasangpit nga mall, ug gipusil niini ang maong lalaki.
Dugang niiini, tumang kahadlok usab ang gipangbati sa ubang mga nakasaksi sa nasangpit nga panghitabo, kini tungod sa kalit ra nga pagpanungab sa suspek, nakadugang usab matud pa sa kalisang sa mga mall goers ang komprontasyon sa pulis ug sa lalaki, diin nagpabuto sa iyahang pusil ang pulis.
Sigon usab sa usa ka saksi nga kung wala kini pusila sa pulis, mamahimong magpadayon pa sa pagpanungab ang nasangpit nga lalaki.
Sa pag kutlo ning balita, padayon pang giila ang tanan nga namatay, lakip na ang suspek, ingon man kung unsa usab ang motibo niini sa iyahang gi buhat.
