BUTUAN CITY -Padayon pang gipangita sa mga rescuers sa Philippine Coast Guard uban sa mga mangingisda ang unom ka mga mananagat human na-missing sa kadagatan tali sa Barangay Mabua ug San Ricardo sa Southern Leyte samtang sakay sa kolor green nga motorbanca nga duna’y tatak nga Divine.
Naila ang mga n-missing nga sila Julieben Edradan, 31-anyos, ulitawo ug maoy boat operator uban sa iyang mga tripolante nga sila JemarBesing, 35-anyos; Allan Solitario, 44-anyos ug Marcelo Doblas Jr., 34-anyos, pulos minyo ug ang mga ulitawong sila Joseph Mapalo, 35-anyos ug Timothy Codillo, 22-anyos.
Gika-ingong nadamyos matud pa ang ilang gisakyang bangka tungod sa mga dagkong balud sa kadagatan nga mihapak niini ug nanulod pa ang tubig sa dagat.
Sa gipagawas nga notice alang sa tanang mariners sa Coast Guard District Northeastern Mindanao, gihangyo nila ang tanang mga barko ug uban pang mga sakyanang pandagat apil na ang mga mangingisda nga makalawig sa maong kadagatan nga lantawon ang posibleng sighting sa mga na-missing apil na sa gisakyan nilang bangkang pangisda ug i-report gilayon ngadto sa pinakaduol nga Philippine Coast Guard kon PCG unit.
