BUTUAN CITY – Walay puas karun ang gihimong combal operation sa 901st Infantry Brigade, Philippine Army dinhe sa rehiyon sa Caraga target ang mga miyembro sa kumunistang teroristang grupo sa hilit nga utlanan sa probinsiya sa Agusan del Sur og Surigao del Sur.
Tungod niini, unom ka sunod-sunod nga mga engkuwentro ang natigayon sulod lang sa usa ka bulan. Miresulta kini sa kamatayon sa tulo ka rebelding New People’s Army kon NPA og pagkakumpiska sa 4 ka high-powered firearms, daghang mga bala, explosibo og uban pang personal nga gamit.
Ang unang engkuwentro natigayon niadtong Marso 25 sa Brgy. Bitaugan, San Miguel, Surigao del Sur nga mikutlo sa kinabuhi sa usa ka rebelde og nakuha ang usa ka M16 rifle. Human sa usa ka semana o niadtong Abril 1, laing pagbinayloay sa bala na usab ang nahitabo sa samang barangay, diin nakuha ang usa ka M16 rifle, medical paraphernalia, og ubang personal nga gamit.
Sa tinguha sa mga rebelde nga makalikay sa combat operations mibalhin kini ngadto sa kabukiran sa Brgy. Kolambugan, Sibagat, Agusan del Sur, apan na-abat gihapon kini sa tropa niadtong Abril 17.
Human niadto, kaduha kini na-engkuwentro sa tropa niadtong Abril 19 nga miresulta sa kamatayon sa usa ka rebelde samtang pagka-ugma napatyan na usab ang mga niini samtang laing mga armas ang nakumpiska.
