BUTUAN CITY – Nag-atubang og kasong parricide ang usa ka amahan human mi-unay pagpatay sa iyang 6-anyos nga anak nga babaye sa Brgy. Dayano, Mainit, Surigao del Norte pasado alas 7:00 ang takna sa nakalabay nga gabii.
Naila ang suspek nga si Jomel Glyn Doring Bonifacio, 23-anyos, dunay kapuyo, usa ka mag-uuma nga residente sa maong dapit.
Base sa impormasyon gikan sa Mainit Municipal Police Station, nagsugod ang panghitabo sa dihang gitudlo sa batang biktima ang iyang amahan nga maoy mikawat sa pulseras og kwarta sa ilang silingan.
Tungod sa kasuko, pag-uli sa balay gikompronta sa suspek ang iyang anak nga miabot sa punto nga giluba kini gamit ang sundangay.
Nakahiagum ug samad ang bata diha sa iyang tiyan nga daling gidala sa Mainit Medicare Community Hospital apan gideklara kining dead-on-arrival sa mi-atender nga doctor.
Nasayrang didto mismo usab sa ospital gi-aresto ang suspek nga karun nagtingkagol na sa Mainit Municipal Police Station alang sa tukmang disposasyon.
