BUTUAN CITY – Gikakurat sa usa ka inahan dihang nadiskubrehan niyang dili mga higala o kaha kabanay kondili si “Papa Jesus” ang kanunay nga ka-video o kaha ka-voice message sa iyang 6-anyos nga anak nga si alyas ‘Pupuy’.
Nadiskubrehan sa 35-anyos nga si Denise Diaz ang history sa Messenger account sa iyang anak nga si Pupuy nga duna’y ka-istorya sa usa ka account nga duna’y pangalang “Papa Jesus.”
Nag-send pa si Pupuy og video ingon man voice message sa maong account, ug pila ka higayon usab niya kining gisulayan pagtawag.
Duna usa’y conversation nga nagbilin pa kini og voice message kang Papa Jesus nga nangumusta pa kini sa langit.
Sigon sa inahan, kanunay nang mangutana si Pupuy kalabot sa Ginoo human namatay ang iyang unom ka buwan pa lang nga ig-agaw nga ginganlan og Kylie.
