Hugot nga siguridad ang gipatuman sa Butuan City Police Office kon BCPO sa pagsugod na ning adlawa sa upat ka adlaw nga 5th National Advisory Council Summit nga gipahigayon dinhi sa Butuan. Sigon ni PCapt. Emmerson Alipit – tigpamaba sa BCPO, kapin sa 300 ka mga delegado gikan sa nagkada-iyang rehiyon sa nasud ang musalmot sa maong kalihukan nga matapos karong Sabado – Nobyembre 16.
Sa eksklusibong pakighinabi sa Bombo Radyo Butuan, gibutyag ni Captain Alipit nga pinaagi sa maong summit, mahisgutan nila uban sa ilang mga partners diha sa natad sa media industry, business industry, mga puliltiko og uban pa, ang mga lakang nga angayang himuon sa ingon mas mapalambo pa sa kapulisan ang ilang serbisyong pamulis.
Mahinungdanon matud pa kini tungod kay ang mga ideyang ilang makuha sa upat ka adlaw nga kalihukan, dili lang gikan sa mga pulis kondili gikan usab sa ilang mga partner members.
Karong adlawa ang pag-abot sa ubang mga delegado kondiin lingawon sila atol sa Mayor’s Night isip pag-welcome kanila dinhi sa Butuan pinaagi sa performances sa mga Butuanon singing champions nga sila Jayson Dy ug Elaine Duran.
