BUTUAN CITY – Padayon ang himuong monitoring sa Police Regional Office kon PRO-13 sa mga kalihukang himuon sa Communist Party of the Philippines–New People’s Army kon CPP–NPA sa ilang ika-57 nga anibersaryo karong Disyembre 26.
Sigon ni PMajor Jennifer Ometer, hepe sa Public Information Office sa Police Regional Office 13, duna gihapon sila’y security measures nga gipatuman hangtud sa maong adlaw bisan og gamay na lang ang nabiling mga manggugubat sa walhong grupo tungod sa pagsurender na sa kadaghanan sa ilang mga ka-ubanan ug pagkamatay usab sa uban atol sa mga engkwentro.
Dugang ni Ometer, dili angayang kumpyansahan bisan og gamay na lang ang pwersa sa maong grupo, aron masigurong dili na sila makalawgaw sa katawhang anaa sa kabukiran.
