BUTUAN CITY – Gi-anunsyo sa Department of Justice (DOJ) nga isipon gihapong kaso sa Kidnapping ang pagkawala sa mga sabungeros taliwala pa man sa gibulgar sa whistleblower nga si Alyas Totoy nga gitambog ang ilang mga patayng lawas sa Taal Lake.
Sumala ni Justice Undersecretary Raul Vasquez, hangtod nga dili makit-an ang biktima, ilabina ang ilang mga patayng lawas, padayon gihapon kining makonsiderar nga kasong kidnapping ug tungod kay wala pay nakitang ebedensya nga patay na ang mga sabungero, rason nga dili pa matawag ang maong insidente nga murder o homicide.
Dugang ni Vasquez, hapit nang makamugna ang DOJ og airtight case human sa mga serye sa imbestigasyon ilabina nga ilang gikonsidera ang tanang nanggawas nga impormasyon ug testimonya kalabot sa maong insidente.
Pagklaro pa ni Vasquez, pipila matud pa sa mga nanunga nga testigo kaniadto, mibakwi na ang ilang mga pamahayag.
Una nang gikumpirma ni Department of Justice (DOJ) Secretary Jesus Crispin “Boying” Remulla nga apil na sa listahan sa mga suspek sa pagkahanaw sa mga sabungero sila Charlie ‘Atong’ Ang ug ang aktres nga si Gretchen Barretto human nanggawas ang mga testimoniya nga nagkutay kanila sa maong kaso.
Sigon sa kalihim, i-assess na unya sa mga prosecutors ang mga ebidensya aron madetermina ang tukmang mga kasong ipasaka batuk kanila sa labing daling panahon.
