BUTUAN CITY – Malampusong naluwas sa mga sakop sa Philippine Coast Guard kon PCG-Surigao City ang 56 ka mga pasahero ug pito ka mga tripolante sa usa ka ferry boat human nabuslot dihang na-igo sa usa ka naglutaw nga dakong kahoy.
Gikan matud pa kini sa lungsod sa Cagdianao sa Dinagat Islands province og padulong unta sa mainland Surigao dihang natigayon ang insidente.
Sigon ni Chief Petty Officer Jeoffrey Monta – deputy station commander sa PCG-Surigao City sa eksklusibong pakighinabi sa Bombo Radyo Butuan, miresulta sa pagkabuslot sa hull ang maong insidente tungod kay nabali man ang propeller og shaft sa ferry boat nga MB Gracemarc 4 apan na-maneuver kini ni ship captain Bernie Bestresa padulong sa Raza Island gamit ang reserbang makina.
Nagpadala gilayon sila og mga rescuers og nag-hire og duha ka mga motorbanca nga maoy mitabang pag-rescue sa tanang mga pasahero kinsa luwas nga nadala sa Surigao City.
Ang MB Gracemarc 4 gipanag-iyahan og gi-operate ni Elfe Longos sa Cagdianao, Dinagat Islands og duna kini capacity nga 93 ka mga pasahero.
