BUTUAN CITY – Nanghinaot ang Sector leader alang sa mga Persons With Disability (PWD’s) ning dakbayan sa Butuan nga si Ritchie Ravelo nga protektahan sa bag-ong pangamhanan sa syudad ang mga sama kanilang dunay apan sa panglawas gikan sa mga mapanamas-tamasong kamot.
Kini human sa gikatahong kamatayon sa usa ka PWD niadtung nakalabayng adlaw, human kini gipusil sa wala pa matino nga suspek sa may Brgy. Ong Yiu ning syudad sa Butuan.
Sumala ni Ravelo nga hugot matud pang gikundina sa ilahang sektor ang nasangpit nga panghitabo.
Dugang panawagan niini nga kinahanglan matud pa nga accessible para sa mga PWD ang serbisyo sa pangamhanan, ilabi na ang proteksyon sa mga kapulisan, kung gikinahanglan.
Apan panawagan niini sa mga membro sa PWD sector nga kinahanglang likayan usab ang mga sitwasyon nga makapa-trigger sa matag-usa, ug likayan usab ang pagsalig nga nakasandig ang ilahang grupo og balaod nga pabor kanila.
Tambag niini sa mga dunay apan sa panglawas nga ugaling dunay mga mangbully kanila, ipaabot nalang kini sa pangmahanan, isip duna may bugti nga salaod ang si kinsa mang manamas-tamas kanila.
