BUTUAN CITY – Makonsidera na matud pang malinawon ang kinatibuk-ang pagsaulog sa ika-50 ka tuig nga kamugnaan sa probinsiya sa Agusan Del Norte bisan ug wala pa kini nahuman.
Kini tungod kay unyang gabii pa ipahigayon ang Coronation Night sa Bae Festival sa lungsod sa Santiago.
Sigon ni Jun Palarca-tigpamaba sa probinsiyal nga kagamhanan, malinawon ug nagmalampuson ang gipatumang aktibidad sa maong selebrasyon diin ang nahimong pinaka-highlight mao ang pag-abot ni Pangulong Rodrigo Duterte kagahapong adlawa, atol sa kaadlawanan sa pagkamugna sa Agusan Del Norte.
Dili matud pa matukib ang kalipay nga gibati sa mga Agusanon sa dihang nakita si Pangulong Duterte atol sa People’s Day sa CSU-Cabadbaran City Campus.
Ang mas nakapasamot sa kalipay sa mga Agusanon mao ang pagsaad ni Pangulong Duterte nga bisan ug unsay pangayoong proyekto ni Gobernadora Angelika Rosedelle Amante Matba, iya kining ihatag.
Tungod niini laumang ma-prayoridad na ang mga proyektong iduso ni Gov. Matba alang sa kaayuhan sa katawhan.
Gipasalamatan nalang niini ang tanang Agusanon sa pagsuporta sa maong selebrasyon.
