BUTUAN CITY – Parehong namahayag sila United States President Joe Biden og Ukrainian President Volodymyr Zelensky human ang pagpirma sa bilateral security agreement sa sidelines sa Group of 7 kon G7 Summit sa Italy.
Ang maong kasabutan maoy dalan alang sa long-term security relationship sa US ngadto sa Kyiv nga posibleng buhaton usab sa musunod nga administrasyon sa Amerika.
Gidayeg ni Biden ang bag-ong 50-bilyones dolyares nga tabang ngadto sa Ukraine human nasabutan sa mga miyembro sa G7 nga mukuha sa maong kantidad gikan sa gi-freeze nga Russian assets.
Gidayeg usab niini ang security agreement nga gipirmahan kauban si Zelensky dayong butyag nga magtugot kini sa duha ka nasud nga mapalapdan ang intelligence sharing, mapadayon ang pagbansay sa Ukrainian troops, ug mag-invest sa industrial base sa Ukraine aron makasuplay na sila og ilang kaugalingong mga bala.
Samtang sa kabahinan ni Ukrainian President Volodymyr Zelensky, gipasegarbo niini ang mga Ukrainians dayung pasalamat sa padayong suporta sa Amerika.
Gikumpirma usab niini nga madawat na nila ang dugay na niyang gipangayu nga F-16 fighter jets og uban pang armas diin lakip sa misaad nga magpadala ang nasud nga Denmark, the Netherlands, Norway ug Belgium.
