BUTUAN CITY – Usa ka pribadong misa ang gipangunahan ni Fr. Joesilo Amalla isip timaan sa pagsa-ulog ning siyudad sa Butuan sa ika-501 nga anibersaryo sa pagpahigayon sa unang Easter Mass sa Pilipinas nga gihimo sa Mazawa, Butuan.
Kini subay na sa nagpadayong claim ning siyudad uban sa mga local ug national historians nga dinhi sa Brgy, Pinamanculan nga naila kaniadtong Mazawa, gihimo ang unang Easter Mass sa nasud.
Sa eksklusibong pakighinabi sa Bombo Radyo Butuan, gipadayag ni historian priest Fr. Joesilo Amalla nga magpadayon siya sa iyang claim bisan sa kakulang sa pundo pinaagi sa pagtibawas na sa iyang gihimong librong duna’y titulong ‘An Island They Called Mazaua’ diin dinhi makita ang tanang mga ebidensya nga kuha gikan pa sa mga libro ni Antonio Pigaffeta, usa ka Italyanong scholar ug explorer kinsa mi-uban sa expedition ngadto sa Spice Islands nga gipangunahan sa explorer nga Ferdinand Magellan ubos sa bandila ni Emperor Charles V.
Atol sa ekspedisyon, nagsilbi siyang assistant ni Magellam kondiin iyang gitaguan ang mga tukmang journal, nga sa ngadto-ngadto nag-assist kaniya sa pag-translate sa linggwaheng Cebuano.
Mapasigarbuhon pang gipakita ni Fr. Amalla ang 3-kilos nga gibug-atong libro nga padayon pang gi-edit aron hingpit nang mahimong libro.
Gidugang pa ni Amalla nga sa padayon niya pagpanguykoy og mga ebidensya, daghan pa unta ang gusto niyang isal-ot sa maong libro apan maguba na kini rason nga gipadayon na lang ang pag-edit niini nga nagastuhan na nila og 40-mil pesos kansa kulang pa sa susamang kantidad samtang tunga sa millyon ka pesos usab ang ilang kinahanglanon alang sa pag-imprinta na unya niini aron mahimo nang hingpit nga libro.
