BUTUAN CITY – Ningkabat sa kantidad nga 340-mil Pesos ang nakumpiska sa mga kapulisan sa Agusan del Norte uban sa tropa sa mga kapulisan sa dakbayan sa Cabadbaran kagahapong adlawa.
Sumala ni PCAPT Honorio Campus, ang tigpamaba sa Police Provincial Office sa Agusan del Norte, anaa sa 50 gramos ang nakumpiska nila nga gituohang shabu, gikan sa suspetsado nga si Rene Darasin Compoc alyas RenRen.
Dugang sa tigpamaba nga dugay na matud pa nilang gipanubayan ang maong suspetsado tungod kay usa man kini sa mga dagkong drug peddler sa dakbayan sa Cabadbaran.
Giangkon usab ni PCAPT Campus nga nanaghan na ang mga nakumpeska nilang drugas ilabi na sa Agusan del Norte ingon man sa dakbayan sa Butuan, apan pagklaro usab niini nga gipahugtan sa ilahang buhatan ingon man sa pangamhanan sa Agusan del Norte ang pag-implemantar sa anti illegal drugs operation.
