BUTUAN CITY – Upat ka mga pulis ang patay uban sa laing usa empleyado sa Misamis Occidental Provincial Tourism Office, human nahulog sa pangpang sa lungsod sa Don Victoriano, ning mi-aging alas-12:20 sa udto, ang usa ka patrol vehicle sa Philippine National Police (PNP).
Ang sakyanan gipanag-iyahan sa 2nd Provincial Mobile Force Company ug nagbiyahe gikan sa Lake Duminagat padulong sa Peduan Falls sa dihang nahitabo ang aksidente.
Sumala ni PCapt Al-Rafat Sapie, hepe sa Don Victoriano Municipal Police Station, nawad-an og kontrol ang patrol car nga duna’y sakay nga pito ka mga tawo, pag-abot sa usa ka likuong parte sa kalsada, hinungdan nga nahulog kini sa pangpang.
Nasayrang apil sa conovy ang mga sakop sa Philippine National Police ug mga personahe sa Provincial Tourism Office nga nag-escort sa mga organizers sa Binibining Pilipinas nga kalihukan.
Samtang duha ka mga pasahero ang naluwas sa aksidente.
