BUTUAN CITY – Lima ka mga trabahante sa plantasyon sa pinya ang patay human mabangga ang hauler truck nga ilang gisakyan sa koral sa usa ka panimalay sa Barangay Lurugan, Valencia City, Bukidnon kagahapon.
Sa inisyal nga imbestigasyon, bag-o pa lang mnhuman sa pag-ani og pinya ang mga trabahante ug pauli na unta sa ilang mga balay dihang natigayon ang disgrasya sa usa ka balay daplin sa paubos nga dalan.
Sigon sa kapulisan, posible nga mipalyar ang preno sa sakyanan sa wala pa mahitabo ang aksidente.
Gidala pa sa duol nga mga ospital ang tanang biktima, apan lima ang gideklarang patay samtang tulo ang naluwas ug padayon sa pagtambal.
Lakip sa mga namatay ang tulo ka babaye ug duha ka lalaki samtang sa mga nasamdan, duha niini ang mga babaye, samtang ang ikatulong biktima wala pa makumpirma human siya madala sa usa ka ospital sa Malaybalay City, Bukidnon.
Gitan-aw karon sa mga imbestigador ang posibilidad nga nag-malfunction ang brake sa trak, ilabina kay nahitabo ang aksidente sa paubos nga bahin sa dalan.
Padayon ang Valencia City Police sa pagtipig og ebidensya ug pagkuha og mga pahayag aron mahibal-an ang eksaktong hinungdan sa aksidente.
