BUTUAN CITY – Anaa na sa luwas nga kahimtang ang 5 ka indibidwal human kini malampusong na-rescue sa dihang mitiklaob ang duha nila ka mga pumpboat sa kadagatang sakop sa Rasa Island, Surigao City, Surigao del Norte.
Migawas sa imbestigasyon nga niadtong alas 2:30 sa hapon sa nakalabay nga adlaw o Disyembre Uno, milawig ang pumpboat MARLIE gikan sa Brgy. Canlanipa, Surigao City og pauli na unta sa Sitio Buyho, Brgy. San Jose, Surigao City sakay ang duha ka indibidwal nga sila Losmar Pontevedra, 30-anyos og Marlon Pontevedra, 19-anyos.
Samtang anaa sa bisinidad sa Rasa Island, kalit lang nga nagkayu ang makina sa motorized pumpboat. Nagdisesyon ang operator nga tuyoon sa pagpatiklaob ang pumpboat aron mapalong ang kalayu samtang mitawag kini og tabang sa iyang kabanay.
Bandang alas 6:00 sa gabii sa samang adlaw sa dihang miabot ang pumpboat nga dunay markang “IVYLYN” nga maoy motabang og mibira sa mitiklaob nga sakyanang pandagat padulong sa Sitio Buyho, Brgy. San Jose, Surigao City.
Samtang nag-guyod ang pumpboat “IVYLYN”gihapak kini sa mga dagkong balud nga maoy hinungdan sa pagkatiklaob niini.
Samtang natiklaob ang duha ka pumpboat, nagpalutaw-lutaw nalang pinaagi sa paggunit sa katig ang 5 ka mga biktima, lakip na niini ang sakay sa pumpboat “IVYLYN nga sila Rommel Ruaya, 29-anyos, Leyjone Fijo, 25-anyos og Ivy Alvarez, 30-anyos nga parehong residente sa Brgy. Canlanipa Surigao City.
Human nadawat ang maong panghitabo sa taga Philippine Coast Guard Quick Response Team, gelayon kining mihimo og rescue operation kauban ang mga personahe sa BFAR MCS 3005 personnel og malampusong naluwas ang mga biktima pasado alas 9:18 sa kagabhion.
Gidala usab ang mga biktima sa Caraga Regional Hospital alang sa dugang medical nga atensiyon.
Ang mga survivors anaa na sa maayong kondisyon sa panglawas gawas sa nahiagum nga minor nga mga paso sa duha ka Pontevedra.
PHOTOS COURTESY OF CGS Surigao del Norte
