BUTUAN CITY – Ipatuman na sa Department of Education kon DepEd-Caraga sugod karong Lunes, Septembre 25, ang pilot run alang sa recalibrated Kindergarten to Grade 10 (K-10) curriculum o mas nailang Matatag curriculum human natapos kagahapon ang tulo ka adlaw nga training-orientation sa gibana-banang 300 ka mga magtutudlo gikan sa lima ka mga tunghaan sa rehiyon nga apil sa napili-ang magpatuman sa pilot implementation sa revised curriculum.
Sa eksklusibong pakighinabi sa Bombo Radyo Butuan, gipadayag ni Department of Education kon DepEd-Caraga spokesperson Pedro Tecson nga apil sa mga tunghaan ning rehiyon nga napili-an ang Santiago Central Elementary School alang sa Agusan del Norte Division; Baobaoan Integrated School ug Pedro Duncano National High School alang sa Butuan City Division; Suyangan Elementary School ug Socorro National High School sa Siargao Island Division.
Giklaro ni Tecson nga ang mga opisyal matud pa sa ilang sentrong buhatan ang mangunay pag-monitor sa implementasyon sa maong curriculum pinaagi sa regional offices.
Ang makuha matud pa nga mga inputs ug mga feedbacks sugod karong Lunes hangtud na sa pagtapos sa School Year 2023-2024 maoy gamiton sa pag-assess ang ka-epektibo niini aron masuta kung angayan ba kining ipatuman sa sunod nga mga school years.
Gipasabot pa sa opisyal nga sa pagpatuman niini nga curriculum, wala nagpasabot nga isalindot na usab ang K-to-12 curriculum tungod kay ang revised K-10 ubos man gihapon sa K-to 12.
Ang gihimo lang sa ahensya mao ang pag-revise sa mga subjects nga gipatuman sa K-to-10 kon gikan sa kindergarten ngadto na sa Grade 10.
Kini ang rason nga gikan sa pito ka mga learning areas, gikunhuran na lang kini ngadto sa lima nga gilangkuban sa learning, reading and literacy, Math, Makabansa ug GMRC kon Good Manners and Right Conduct.
Kini samtang nagpadayon pa usab ang pagproseso nila alang sa revision sa mga subjects sa Grade 11 ug 12.
