BUTUAN CITY – Naghimo na og imbestigasyon ang kasundaluhan sa nahitabong pagpanunog sa rebeldeng New People’s Army kon NPA sa 5 ka mga motorsiklo sa may Sitio Kauswagan, Barangay San Mateo sakop ning siyudad sa Butuan.
Sigon ni Capt. Al Anthony Pueblas, Civil Military Operation kon CMO Officer sa 402nd Brigade Philippine Army, nakig-alayon na usab sila sa kapulisan aron masuta kung gipanag-iyahan ba ang maong mga motorsiklo sa sundalo oga mga pulis.
Gihimu ang pagsunog kagahapon sa alas 2:00 sa hapon sa gitu-uhang miyembro sa Guerilla Front Committee 4-A sa NPA.
Gihulagway pa ni Capt. Pueblas nga desperado na ang mga rebelde tungod kay bisan ang mga butang nga wala makasala kanila, ila namang hilabtan.
Desperado na matud pa sila tungod sa mga sunod-sunod nga nahitabo sa ilang grupo sama nalang sa duha ka patay sa ilang panig human niulbo ang engkuwentro sa niaging adlaw samtang dunay misurender nga mga rebelde diin ang usa niini usa ka kumander nga posibleng ipagawas ang kumpletong detalye niini karung adlawa. (Rolan Janea)
