BUTUAN CITY – Hilabihan ang pagpasalamat sa pamilyang Del Rosario ning dakbayan sa Butuan human hingpit nga na-ayu ang 5 ka miyembro niini batuk sa Covid-19.
Nasayrang ang nasangpit nga mga nataptan sa Covid-10 pulos health care workers, 2 ang doctor og 3 ang nurses.
Saysay pa ni Edracel sa eksklusibong pakighinabi ning sibyahan, 2 ka semana na ang nakalabay sa dihang nakasinati og simtomas sa Covid-19 ang ilang inahan nga 69-anyos nga si Dra. Edna kansa usa ka doctor sa Butuan Medical Center.
Niadtong panahona, naka-isolate na ang ilang inahan apan natakdan gihapon silang 4 ka mga anak.
Sumala pa ni Edrasil, duha ka adlaw lang sa dihang naka-isolate ang ilang inahan, mibati na usab sila ug taas nga hilanat, pag-ubo og sip-on nga gisundan sa pagkawala sa iyang panlasa og pagpanimhot rason nga gi-admit sila sa BMC Annex.
Apan ang ilang inahan nakasinati sa severe pneumonia rasong gibalhin nila kini sa Butuan Doctors Hospital diin gihatagan og critical care. Gikonsidera usab nilang milagro ang nahitabo sa ilang inahan tungod kay paglabay sa pipila ka adlaw nawala ang gihambin niining severe pneumonia.
Sa karun, bisan og nakauli na sila sa panimalay og stable na ang kahimtang sa ilang inahan, apan duna gihapoy oxygen tank nga naka-standby samtang padayon silang naka-isolate sulod sa duha ka semana.
Tungod niini, hilabihan ang pasalamat ni Edracel sa tanang nag-ampo sa ilang kaayuhan human nataptan sa Covid-19.
Lakip na usab ang naghatag ug pinansiyal nga suporta dungan sa pagbutyag nga hilabihan kamahal gayud ang magka-covid. Ang labing gipasalamatan usab niini mao ang wala nila kasinati og diskriminasyon.
Kini dayung pahimangno sa tanan nga seryusuhon ang kasamtangang pandemya nga giatubang sa tibook kalibutan.
