BUTUAN CITY – Gikumpirma ni SFO2 Alan Salvaña, imbestigador sa Bureau of Fire Protection sa lungsod sa San Francisco, Agusan del Sur nga patay ang tanang lima ka mga miyembro sa pamilya Abelita human na-abo sa sunog ang ilang balay pasado alas-10:45 kagabii.
Gi-ila ang mga biktimang sila Kim Abelita, amahan og ang asawa niining magtutudlo nga si Marivic apil na ang ilang mga anak nga sila Lendy, 10-anyos, Cedric, 6-anyos og ang 3-anyos nga si Rihanna, parehong residente sa Purok 4-C, Brgy. 2 sa maong lungsod.
Sa inisyal nga imbestigasyon, migawas nga posibleng faulty electrical wiring ang hinungdan sa sunog human na-obserbahan ning mi-agi pang gabii nga nagkipat-kipat na ang suga sa ilang sala.
Wala usab nila gikonsiderang gituyo ang pagsunog sa pnimalay sa mga biktima tungod kay base sa ilang imbestigasyon, pulos mga maayong tawo matud pa ang nasangpit nga pamilya.
Base sa ilang gihimong follow-up investigation, makagawas na unta sa ilang pinuy-anan ang amahang si Kim human niini giguba ang tuong bintana sa ilang panimalay apan mibalik kini pagsulod hangtud nga misulod sa kwarto diin nangatulog ang iyang pamilya, resulta nga apil kini sa namatay. (Beth Ruiz)
