BUTUAN CITY – Patubagon sa mga otoridad ang mga rebeldeng New People’s Army kon NPA nga responsable sa brutal nga pagpatay sa lima ka mga lalaki niadtong Mayo 3 ning miaging tuig 2021.
Kini human ang malampusong pagkalot sa ilang mga patay’ng lawas kaganina kansa gi-usa lang paglubong sa usa ka bangag lang sa yuta sa bukirang bahin sa lungsod sa Santiago, Agusan del Norte.
Sa eksklusibong pakighinabi sa Bombo Radyo, gipadayag ni Col Cresencion Gargar, commander sa 29th Infantry Battalion, Philippine Army, nga natud-an ang maong mass grave human kini gipiya-it sa rebel surrenderee nga saksi sa maong hitabo.
Naila ang mga biktima nga sila Ruel Macuray; Jason Macuray; Marlon Macuray, Leomar Iligan ug Rommel Qulliano, parehong residente sa Sitio Gapoy, Brgy. Hinapuyan, Carmen, Surigao Del Sur.
Base sa saysay sa informant, ila matud pang gidakop ang lima nga nanguha niadtong higayuna og lapnisan kon Agar wood aron duna’y pangpalit og kunsumo sa ilang pamilya hangtud nga gipamusil na ug gilubong.
Sigon ni Col. Gargar, ang gihimo matud pa sa mga rebelde, klarong ebidensya sa ilang ka-brutal rason nga muhimo sila og aksyon aron mapanubag ang mga responsable niini.
Gi-ila na kung kinsa sa lima ang angayang ma-claim sa ilang pamilya aron mahatagan og desenteng lubong dungan sa pagsaad nga suportado nila ang lakang nga himuon sa na-ilang pamilya sa mga biktima aron mahatagan og hustisya ang ilang kamatayon.
