BUTUAN CITY – Upat ang patay on-the-spot human aksidenteng gidaro sa usa ka truck wing van ang upat ka mga sakyanan pasado alas-5:19 kaganinang sayo sa buntag, sa Km-9, Purok Narra, Barangay Quezon, Surigao City, lalawigan sa Surigao del Norte.
Gi-ila ni PLCol Mariano Lukban, hepe sa Surigao City Component Police Station, ang driver sa wing van nga si Randy Flores Gonzaga, 36-anyos, minyo ug residente sa Purok 5, Nabunturan, Brgy Sampaguita, lungsod sa Kebawe, Bukidnon.
Nasuta nga gikan ang wing van sa Cagayan de Oro City ug padulong sa Surigao City kagra ang mga dairy products dihang natigayon ang insidente.
Apil sa nabanggaan niini ang ang Nissan Urvan Van nga gimanihoan ni Benbo Roluna Prado, 43-anyos, taga Blk-16 Lot-5 Virgo St., Molino 1, Bacoor, Cavite; usa ka motorsiklo nga gimanihuan ni Edmar Lanugon Amplayo, 23-anyos, taga P-2 Cansayong, Malimono, Surigao del Norte nga duna’y backride; laing motorsiklo nga gidrayban ni Ferdinand Jay Rosite Rodriguez, 24 anyos, aduna usa’y backrider ug laing motorsiklo nga gipanag-iyahan ni Karyll Salubre Orillo, 28-anyos, minyo, taga P-Narra, Brgy. Quezon, Surigao City.
Dugang ni LCol Lukban, anaa na sa ilang kostudiya ang driver sa wing van alang sa tukmang disposasyon kinsa gika-ingong nakatagpilaw matud pa atol sa iyang biyahe hinungdan sa disgrasya.
