BUTUAN CITY – Dili mu-ubos sa upat ka tawo ang namatay samtang 23 ang angol human nahulog sa pangpang sa Barangay Magais I, Del Gallego, Camarines Sur ang usa ka de-pasayruang bus nga gikan sa Cubao ug padulong unta sa Gubat, Sorsogon kaganinang kaadlawon .
Sumala ni PCapt. Bernie Undecimo, Chief of Police sa Del Gallego Municipal Police Station, base sa inisyal nga report, mitakilid ang bus samtang gibaybay maong lugar, hinungdan nga nahulog kini sa gibana-banang 10 ka metrong pangpang.
Base sa imbestigasyon, mihunong pa ang bus sa Tabogon, Daet aron mukaon ang mga pasahero ug pila ka oras human mibalik og dagan ang bus, dinhi na nahitabo ang aksidente.
Gilayon nga mitubag ang mga personnel sa PNP, Bureau of Fire Protection, ug mga volunteer rescuers aron tabangan ang mga biktima ug gidala ang mga nasamdan sa nagkalain-laing mga ospital sa silingang mga lugar.
Pipila sa mga nasamdan naka-angkon og head trauma, mga samad sa ulo ug lawas, injury sa dughan ug likod, samtang aduna usa’y mga pasahero nga luwas ug wala ma-angol.
Ang driver sa bus gi-report nga wala’ sa ‘y panimuot ug karon gidala pa sa ospital, samtang ang alternate driver naka-angkon og injury sa likod.
Padayon ang hugot nga imbestigasyon sa mga awtoridad aron matino ang tinuod nga hinungdan sa aksidente ug aron matudlo ang responsibilidad sa mga nalambigit.
