BUTUAN CITY – Gipahimangnuan sa usa ka espesyalista ang publiko nga kinahanglang magpakunsolta na sa doktor ugaling kanunay na kining gisip-on, mangatol ang ilong, o di ba kaha ubhon taliwala pa man nga nagtumar na kini og tambal tungod kay posibleng allergic rhinitis na ang nasinatian niini.
Sumala ni Dr. Ma. Cecilia Montalban, usa ka otorhinolaryngologist, duha ka klase ang allergic rhinitis, kini mao ang seasonal, ingon man ang perennial. Seasonal matud pa ang allergic rhinitis kung mabati kini sa usa ka tawo sa pila lang ka bulan sa usa ka tuig, apan matawag perennial na kini kung tibook tuig na kining gibati.
Subay sa doktor, tungod matud pa ang seasonal rhinitis sa mga polens nga dala sa panahon sama sa mga polen sa bulak, kahoy, o di ba kaha sa sagbot nga mutungha lang sa pila ka bulan sulod sa usa ka tuig.
Samtang ang perennial rhinitis, posibleng tungod usab kini sa mga abog sa balay, sa mga binuhing hayop, sa mga ok-ok ug uban pang mga allergens nga maka-trigger sa pagpangatol sa ilong, tutunlan, mata ug uban pa.
Kasagaran matud pa nga trigger sa maong sakit ang di mapugngan nga pagtulo sasip-on, katol nga tilaokan, katol nga ilong, perming magluha nga mata, ug perming kapoy ingon man halos dili makapahulay matag- gabie.
