BUTUAN CITY – Nagpadala na og dental records sa ilang mga kasundaluhan, ang 4th Infantry Division, Philippine Army aron magamit pag-ila sa 30 gikan sa 37 nila ka mga army personnel nga nakalas dihang nahagsa ang ilang gisakyang C130 transport plane didto sa Patikul, Sulu.
Sa eksklusibong pakighinabi sa Bombo Radyo Butuan, gipadayag ni Major Francisco Garello, OIC spokesperson sa 4th ID, PA, sa pagkakaron, pito pa lang sa 37 nga nakalas nilang mga ka-ubanan ang na-ilhan.
Ang maong ihap, kabahin sa 49 nga mga nakalas nga military personnel kondiin ang laing 12 gilangkuban na sa mga Air Force personnel.
Sa 96 nga mga sakay sa nasangpit nga cargo plane, 47 nila ka mga army personnel ang na-angol ug nagpa-alim na sa balay-tambalanan.
Napahibalo na usab nila ang kabanay sa mga biktimang sundalo apil na kadtong mga nadala sa ospital.
