BUTUAN CITY – Dili muminos sa 40 ka mga migrants ang patay human nasunog ang bangka nga ilang gisakyan samtang anaa sa kadagatan sa northern coast sa Haiti. Sigon sa International Organization for Migration (IOM), laing 41 ang naluwas sa mga sakop sa Haitian Coast Guard.
Nasayrang naglawig ang bangka gikan sa Cap-Haitien padulong unta ngadto sa Turks and Caicos Islands, kansa kapin sa 220-kilometros ang gilay-on.
Wala pa masuta ang hinungdan sa pag-ulbo sa kalayo apan usa ka local official ang nagbutyag nga nagdagkot matud pa og kandila ang mga pasahero subay sa ilang ritwal nga gipahinungod alang sa luwas nga pagbiyahe kondiin midakop matud pa sa kalayo ang mi-awas nga gasolina padulong ngadto sa mga drums nga puno og gasolina.
Gi-atiman na sa mga personahe sa International Organization for Migration ang mga angol, ug 11 kanila ang gidala ngadto sa pinakaduol nga ospital.
Nasayrang libuang mga tawo ang mangkagiw sa Haiti kada-tuig aron makalingkawas sa tumang kalisod, kagubot ug mga gang violence.
Ang magkaribal nga mga armadong grupo maoy naglumba pagkontrola sa capital, Port-au-Prince, sa sayong bahin ning tuiga nga maoy hinungdan sa pag-resign gilayon ni Prime Minister Ariel Henry paglabay sa pipila ka semana.
