BUTUAN CITY – Mukabat sa kapin 40 ka bus units ang nasapon sa Land Transportation Franchising and Regulatury Board kon LTFRB-Caraga sa gipahigayong inspeksyon sa ahensya kagahapong adlawa sa Langihan terminal nga wala’y Global Positioning System kon GPS device.
Sa eksklusibong pakighinabi sa Bombo Radyo Butuan, giklaro ni LTFRB-Caraga OIC Director Cristina Cassion, nga ang pag instalar og GPS device sa bus unit alang sa kaluwasan sa mga sumasakay.
Gibutyag sa opisyal nga higayong maglusad sila ug inspeksyon basta lang matod pa nga itudlo ngadto sa mga enforcers ang matod pa installed nga GPS apan walay mapakitang GPS sticker sa wind shield nga maoy ebidensya nga duna’y GPS ang maong sakyanan, base sa nakalatid sa Circular Memorandom 2015-21.
Gidugang pa ni Cassion nga tumong niini nga ma-monitor ang speed limit sa sakyanan. Sa operasyon sa LTFRB-Caraga kagahapon sa buntag, walay nakitang GPS sticker sa wind shield sa pipila ka mga bus units sa Bachelor Express Incorporated ug sa Metro Shuttle Corporation.
Gi-angkon sa opisyal nga dunay natigayon tensyon atol sa inspeksyun diin nabalda kadali ang biyahe human nga nitago ang mga drivers ug konduktor agi’g pagprotesta.
Hinuon nabalik sa normal ang biyahe human nga napasabot sa ilang mga enforcers nga mas dako ang atubangong problema sa bus company higayong dili sila mubalik sa biyahe ug mabalda ang pag-transport sa mga pasahero.
