BUTUAN CITY – Upat ka mga tawo na ang natalang patay apil ang duha ka mga bata tungod sa magnitude 6.3 nga linog sa Mindanao.
Tulo sa mga niini natala sa Magsaysay, Davao del Sur apil ang 2-anyos nga batang babayeng si Kristine Ruda nga nahagbaan og pader sa Brgy. San Isidro. Sa Brgy. Malapitan, patay ang usa ka inahan og iyang anak samtang nakalingkawas usab ang padre-de-pamilya ug duha pa nila ka mga anak.
Namatay usab ang 7-anyos nga batang babaye sa Datu Paglas sa Maguindanao. Sigon ni Tulunan, North Cotabato Mayor Ruel Limbungan, gikan sa Datu Paglas sa Maguindanao ang biktima diin gidala kini sa ospital sa Tulunan apan gideklara sa mga doctor nga kini patay na.
Samtang nagdisesyon usab si Davao City Mayor Sara Duterte nga kanselahon klase sa tanang lebel karung adlawa apan giklaro niini nga dunay trabaho ang mga empleyado sa gobyerno. Miabot usab sa 20 katawo ang samdan tungod sa linog sa Magsaysay, Davao Del Sur.
Sumala ni Anthony Allada, information officer sa Magsaysay nga gidala gelayon sa balay tambalanan ang mga nasamdang biktima ug daghang balay usab ang naguba sa nasangpit nga linog.
Nasunog usab ang Gaisano mall sa GenSan human ang pag-igo sa linog.
Gi-isa na sa Bureau of Fire Protection sa alert level four ang nasangpit nga sunog ug gisuta pa sa mga otoridad kung dunay nabiling tawo sa sulod sa dakbalay.
