BUTUAN CITY – Misaka pa ang upat ka tawo ang patay sa pagdahili sa yuta sulod sa Gabule Compound, Sambulawan, Zone 1 Brgy Agusan, sakop sa Cagayan de Oro City kagabie nga mugna sa kusog nga pag-ulan dala sa bagyong Basyang.
Unang narekober ang lawas sa magti-ayong Paul ug Ruffa Lariosa, kinsa dead on the spot samtang nadala sa hospital ang laing upat nga nakalot sa rescue team sa Agusan Barangay Disaster Risk Reduction and Management Office kon BDRRMO ug City Disaster Risk Reduction and Management Council kon CDRRMC.
Wala na matabang sa mga doktor ang narekober nga usa ka tuig, ug 13 anyos nga bata, tungod kay dead on arrival na sila pag-abot sa ospital, samtang kritikal usab ang laing duha.
Gikumpirma ni Agusan Brgy Chairman Andrew Mellisa nga gi-abisohan nang daan ang maong mga pamilya nga mamakwit tungod kay natumbok nga landslide prone area ang ilang natukuran sa pinuy-anan.
Sa pagkakaron, anaa sa siyam ka pamilya ang nagpasilong sa ilang gymnasium nga gilangkoban sa 118 ka indibidwal.
