BUTUAN CITY – Upat ang patay samtang laing 13 ang angol sa ngilngig nga aksidente sa kadalanan partikular sa Makar-South Cotabato Road sa Barangay Apopong, General Santos City kagabii.
Sigon sa General Santos Traffic Enforcement Unit, head-on nga nagbangga ang usa ka van ug usa ka pickup truck sa six-lane highway hinungdan sa kamatayon nila Rasol Angkob Adam, 56-anyos, residente sa Datu Odin Sinsuat, Maguindanao kinsa maoy driver sa van ug mga pasaherong sila Mila Kanapia, 49-anyos sa Cotabato City; Mambai Adam Dimaraw, 58-anyos sa Datu Odin Sinsuat, Maguindanao ug Mora Butuan Salilaguia, 62-anyos, residente sa Buluan, Maguindanao.
Siyam ka mga pasahero sa van ang angol gawas pa sa upat nga sakay sa pick-up truck apil na ang driver niini.
Padayon ang gihimong imbestigasyon sa kapulisan sa maong hitabo aron madetermina kung kinsa ang angayang manubag niini.
