BUTUAN CITY – Wala pa gihapon ma-locate sa mga rescuers sa Myanmar ang upat ka mga Filipino nga una nang gikatahong missing human gitay-og sa 7.7 magnitude nga linog niadtong Marso 28 sa hapon.
Sa eksklusibong pakighinabi sa Bombo Radyo Philippines, gipadayag ni Department of Foreign Affairs Undersecretary Eduardo de Vega, wala pa gihapon makita ang maong mga OFWs gikan sa nahugmak nga dakbalay diin gitu-uhang maoy ilang na-abtan atol sa linog tungod sa kawala’y igong makinaryas nga mukabot sa dapit diin posibleng na-ipit nga mga biktima.
Dugang sa opisyal, kadtong mga Filipino survivors usab, anaa na sa luwas nga kahimtang bisan og na-trauma ug gikatakdaang hatagan og financial assistance sa gobyerno aron ilang magamit sa inadlaw-adlaw nilang galamiton ilabina kadtong mawad-an unya og trabaho.
Kung ubay-ubay matud pa ang mga Pinoy sa Myanmar nga apektado sa gamhanang linog, lahi didto sa Thailand tungod kay gamay lang ang apektado gumikan sa kalig-on sa ilang istraktura nga dili basta-bastang matarog sa linog.
Na-stress lang matud pa ang maong mga OFWs sa mismong adlaw sa linog tungod kay wala una sila gipabalik sa ilang pinuy-anan.
