BUTUAN CITY – Tingkagol sa bilangguan ang upat ka mga lalaki human nasapon nga nagpataya og swertres atol sa gilusad nga Oplan Bolilyo sa Nasipit, Agusan del Norte ug dinhi sa dakbayan sa Butuan.
Unang nasikop ning mi-aging alas-8:00 sa gabii (Pebrero 21) sa Purok 1-A, Brgy Ampayon ning siyudad sa Butuan ang 65-anyos nga si alyas Lolo Canor, residente sa maong lugar kinsa nakuhaan og ₱3,550.00 nga taya uban sa mga gamit nga pangtaya sa maong pasugal.
Samtang pagkasunod adlaw (Pebrero 22), unang nasikop pasado ala-1:50 sa hapon si alyas Ondoy, 44-anyos, minyo, samtang nagpataya usab sa iyang lugar sa District 8, Brgy. Triangulo, Nasipit, Agusan del Norte.
Samtang pagka-alas-3:20 sa hapon, dungan usab nga nadakpan sila alyas Goryo, 44-anyos, minyo, residente sa Purok 5, Brgy. Poblacion ug si alyas Renren, 44-anyos, minyo ug residente sa Purok Tanguile, Brgy. Talisay sa susamang lungsod.
