BUTUAN CITY – Makasinati og 12-oras nga pagkapalong sa kuryente ang pipila ka lungsod sa Agusan del Sur karong Dominggo, Hunyo 2, gikan sa alas-sais sa buntag ngadto na sa alas-sais sa gabii.
Sigon ni Kristoffer Abellanosa, ang tigpamaba sa National Grid Corporation of the Philippines kon NGCP-Mindanao, tumong niini nga ma-repair ang natumbok nga mga istraktura gikan sa lungsod sa Bislig, Surigao del Sur ngadto na sa Trento 69-kilovolt line.
Tungod niini, apektado niini ang mga lungsod sa Trento, Bunawan, Sta. Josefa ug Veruela tungod kay ang nag-supply niini og linya sa kuryente naggikan man sa NGCP Bislig sub-station.
Ibalik gilayon ang linya sa kuryente kung mahuman og sayo ang ilang maintenance ug upgrading activities nga aprubado sa Department of Energy kansa naka-eskedyol na sa calendar year ilabina nga wala pa na-igo sa ting-ulan ang rehiyon.
