BUTUAN CITY – Opisyal nang gisugdan ning adlawa, Lunes, Hulyo13 ang operasyon sa usa ka bus company ning syudad alang sa bag-ong ruta nga gi-abrihan sa Land Transportation Franchising and Regulatory Board (LTFRB) Caraga.
Kini human gitugutan na ang bag-ong ruta sa pampublikong transportasyon gikan sa Brgy. Tinucoran, Las Nieves, Agusan del Norte padulong ning siyudad sa Butuan ug vice versa.
Sigon ni LTFRB-Caraga OIC -Regional Rirector Maria Kristina Cassion, subay usab kini sa Regional Office Circular Number 2020-022 aron paspas na ang pagbyahe sa mga pasahero gikan sa Brgy. Mandamo, Florida, Maguinda, Sumile, Maibu, Bilay, Don Francisco. Salvacion, Tagabaca, Pigdaulan, Aupagan ug Lemon kung sila mopa-ingon sa lungsod sa Las Nieves ug panaog usab sa sentro ning siyudad.
Sa eksklusibong pakighinabi sa Bombo Radyo Butuan, gidugangni Cassion nga experimental pa kini aron sukdon ang demand sa mga pasahero sa maong ruta pinaagi sa upat ka mini-buses sa Bachelor Express, Inc. sugod alas sais sa buntag, nga sundan sa alas-nuwebe sa buntag, ingon man sa ala una ug alas kwatro sa hapon.
Tumong niini nga madali ug dili mabug-atan ang katawhan sa nasangpit nga mga barangay sa ilang pagbyahe sa Butuan ilabi na sa pagkanaog sa ilang mga produkto sa umahan nga makatabang ug dako sa ilang panginabuhian.
Gipahinumduman usab ang mga mananakay mag-obserbar gihapon sa mimum health protocols sama pagsuot sa face mask, physical distancing ug singkwenta porsyento lamang sa kapasidad sa bus ang makasakay nga pasahero.
