BUTUAN CITY – Nakumpleto na sa International Criminal Court kon ICC ang upat ka adlaw nga confirmation of charges hearing batuk kang kanhe Pangulong Rodrigo Duterte.
Sa nasangpit nga pagdungog, parehong naghatag sa ilang katapusang argumento ang panig sa depensa ug prosekusyon nga mamatikdan ang kalahian sa panglantaw.
Sigon ni Presiding Judge Iulia Antoanella Motoc, magpahigayon og deliberasyon ang hukmanan og magpagawas sa desisyon sulod sa 60 ka adlaw kung ipadayon ang kaso sa usa ka hingpit nga pagtaral.
Tulo ka ihap sa crimes against humanity ang gipasaka batuk kang Duterte lakip na ang murder ug attempted murder mahitungod sa liboang pagpatay gikan sa 2013 hangtud sa 2016 og sa panahon sa “war on drugs” gikan sa Hulyo 2016 hangtud sa Setyembre 2017.
Gipamugos sa prosekusyon nga gigamit ni Duterte ang gibansagang “Davao model of killing” isip kabahin sa iyang kampanya sa pagkapangulo ug gipatuman kini sa tibook nasud pinaagi sa opisyal nga Command Memorandum Circular.
Sa ilang pamahayag, gitumbok sa mga representante sa mga biktima nga ang kampanya kontra droga naghatag og sistematikong pagpatay ug grabe nga kahadlok sa mga komunidad.
Samtang ipadayon sa lead counsel sa depensa nga si Nicholas Kaufman ang iyang argumento mahitungod sa Count 2 nga mitumbok sa gibansagang high-value targets, ug gipamugos nga walay igong ebidensya aron ilambigit si Duterte sa mga pagpatay.
Ang depensa usab mibarog nga dili direktang mapakita ang pagpanubag sa kanhe pangulo sa mga insidente.
Ang confirmation of charges hearing dili pa mao ang pagtaral kundi pagsusi kung dunay lig-on nga basehan aron dalhon ang kaso sa full trial.
Kung makumpirma ang mga pasangil, magsugod ang hingpit nga pagtaral aron desisyunan ang tulubagon ni Duterte.
