BUTUAN CITY – Dili gihapon madawat sa magti-ayong sila Ane Rose Misperos Castillo, 25 anyos ug Jistony Marabe Castillo 28 anyos, parehong residente sa Purok 7 Barangay Pautao, Bacuag, Surigao del Norte, ang gidangatan sa ilang ilahang 4-anyos nga anak human kini walay kukaluoy nga gitigbas-patay sa ilahang silingan.
Naila ang suspek nga si Merlito Berong Ladica, 42 anyos ug parehong residente sa nasangpit nga lugar.
Subay sa imbestigasyon sa Bacuag Municipal Police Station, nagdula-dula lamang matud pa ang biktima uban sa iyang mga amigo dihang kalit nalang nga miabot ang suspek nga nasuko tungod kay nagtuo kini nga ang bata maoy hinungdan sa nangamatay nga isda sa iyahang fishpond, dayun tigbas sa bata gamit ang sundang.
Alayon niini, nakita nalang sa ginikanan ang bata nga nagbuy-ud sa kasagbutan duol ra usab sa nahitabuang krimen. Naangkon sa biktima ang samad-tinigbasan sa ulo, nawong, ingon man sa kamot rason sa hinanali niining kamatayon.
Sa kasamtangan, tingkagul na sa selda ang suspetsado human kini nasikop sa mga kapulisan atul sa gipahigayong hot pursuit operation, padayon pa usab nga gipanubayan ning sibyahan ang hinungdan sa kamatayon sa mga isda sa maong suspek.
