BUTUAN CITY – Landig sa ospital upat ka mga indibidwal tungod sa panagbangga sa mga sakyanan sa may Brgy. Bayanihan ning siyudad pasado alas-9:10 kagabii.
Nasayrang nagsubay matud pa sa Diversion Road sa Brgy. Bayanihan ang usa ka Pajero nga gimanehuan ni Andre Calonzo, 34-anyos, residente sa Burgos Extension, Brgy. Tandang Sora ning siyudad.
Nabanggaan niini ang mihunong nga traysikol nga gimanehuan ni Sergio Cuevas, residente sa Brgy. Doongan ning siyudad ingon man ang motorsiklo nga duna’y tulo ka mga sakay.
Naila ang mga na-angol nga sila Cuevas og ang sakay sa motorsiklo nga sila Jupiter Timcang, 23-anyos, driver og mga angkas nga sila Kenneth Bryan Hantod, 21-anyos og Jennylyn Hantod, 21-anyos, pulos residente sa Purok 4, Sitio Dumayukdok, Brgy. Kinamlutan ning siyudad.
Misaad si Calonzo nga abagahon ang galastuhan sa mga biktima sa ilang pagpa-ospital. (Beth Ruiz)
