BUTUAN CITY – Wala na makatabok sa bag-ong tuig 2026 ang manager ug trabahanteng mag-amahan human silang tanan namatay samtang anaa sulod sa septic tank sa usa ka poultry farm sa Barangay Sampatulog, lungsod sa Alubijid, Misamis Oriental kagahapon sa buntag.
Gi-ila ang mga biktima nga sila Bobby Payagon, 26 anyos, minyo, residente sa Sumilao, Bukidnon, manager sa Buen Poultry Farm; Nilo Buntag, 43 anyos ug ang 16 anyos niyang anak nga si Gian Carlo, nga mga residente mismo sa maong lugar.
Sigon ni Police Capt. Fernan Bangot, hepe sa Alubijid Municipal Police Station, gikuha matud pa ni Payagon ang nahulog nga plier sulod sa septic tank nga iyang gilimpyohan, apan kalit siyang nawad-an og panimuot rason nga misulay usab og tabang kaniya si Buntag aron hatagan og first aid si Payagon, apan wala niya makaya ang baho sulod sa tangke hinungdan nga siya usab nawadan og panimuot ug misunod ang anak niining si Gian Carlo, na susama usab kanila ang nadangatan.
Dalong mitabang ang mga rescuers sa Rural Health Unit pinaagi sa pagbuslot sa kilid sa septic tank ug usa-usa nga gipagawas ang mga biktima ug gidala sa OWWA-Alubijid Hospital, apan dead on arrival sila pag-abot sa ospital.
