BUTUAN CITY – Mas bongga ang coronation night unyang gabii alang sa Miss Universe Philippines 2022 tungod kay gipangandaman kini og maayo ilabina ang dakong entabladong gamiton apil na ang production number sa mga kandidata.
Sigon ni beauty pageant expert Jory Rivera, ang maong indigay sa ka-anyag mao ang pinaka-unang higayon nga buksan kini ngadto sa publiko tungod kay sa una ug ikaduhang edisyon Miss Universe Philippines, gipa-ilalom man sa bubble ang mga kandidata niadtong higayuna kondiin limitado kaayo ang audience tungod sa COVID-19 pandemic.
Dugang ni Rivera, nakadugang sa kabongga sa maong pageant ang presensya sa lima ka mga Miss Universes nga langkuban nila Pia Wurtzbach, Demi Leigh Tebow, Iris Matinnaere, Catriona Gray ug ang kasamtangang nagkupot sa korona nga si Miss Universe 2021 Harnaz Sandhu gikan sa India.
Gipasabot ni Rivera nga sukad pa kaniadto hangtud karon, ang pilion sa mga hurado nga mananaog mao kadtong nagdala dili lang sa ka-anyag sa kanindot sa lawas, talento ug uban pa kondili ang iyang abilidad nga mahimong maayong tigpamaba sa Miss Universe Philippines Organization.
Samtang sa korona usab nga itaud alang sa mudaog karong tuiga, giklaro ni Rivera nga bag-o kini nga gama sa Jewelmer collection kumpara sa una ug ikaduhang korona nga lahi ang naghimo.
Ang korona karong tuiga kansa elegante ug customized kaayo, gidayan-dayanan matud pa og mga South Sea pearls.
