BUTUAN CITY – Padayon pang gi-verify ang taho nga mu-abot sa 35 ka mga tawo ang patay sa pagkuso-kuso sa bagyong Odette didto sa Dinagat Islands province ug wala pa’y labot ang missing.
Sa eksklusibong pakighinabi sa Bombo Radyo Philippines, gitaho ni Bombo Dinagat Islands correspondent Ruel Hipolan nga sa ilang paglibot sa Dinagat Islands province, iyang nasuta nga kadaghanan sa mga namatay nga anaa sa mga coastal areas, na-igo sa storm surge samtang ang anaa sa bungtod ug ubos nga bahin, nanga-igo usab sa natumbang mga kahoy ug poste sa kuryente.
Mi-abot sa 100 ka mga barangay sa pito ka mga lungsod sa nasangpit nga lalawigan ang totally damaged tungod sa kadaghan sa mga natalang landslides nga mi-abot sa 35.
Karon pa lang nasayran ang maong damyos tungod kay hangtud sa pagkutlo niini nga balita, wala pa pa gihapo’y linya sa kurynte ug komunikasyon ang maong probinsya.
Gawas pa, dili usab makatabok sa mainland Surigao ang mga Dinagatnons tungod kay nadamyos ang kadaghanan sa ilang mga motor banca ug wla usa’y available nga gasolinang magamit aron mapa-andar kini.
Tungod kay nagpabiling isolated, daghan ang wala pa na-abtan og mga ayudang pagkaon ug limpyong tubig ma-inom kansa delikado kung mulungtad pa og usa ka semana nga dili sila maayudahan ilabina nga daghan sa mga bata ang nagutman na.
Gitaho usab ni Hipolan nga wala pa’y media organization nga naka-abot sa maong lalawigan ug ang mga residenteng nakakuha og balita, mao lamang kadtong duna’y satellite-fed nga mga TV sets apan nadismaya tungod sa kawala’y saktong video footage nga mapakita aron unta masayran sa tanan ang gidak-on sa damyos nga hatud ni Odette sa maong lalawigan apil na niini ang pagkahapay gyod sa halos tanang mga istraktura.
