BUTUAN CITY – Nakatala pa og dugang 34 ka mga bag-ong kaso sa COVID-19 ang Caraga Region hinungdan sa kinatibuk-an, misaka na usab ngadto sa 2,225 ang kaso sa entiro rehiyon.
Sumala sa Center for Health Development-Caraga, gilangkuban ang mga bag-ong kaso sa 18 ka mga lalake samtang 16 ang babae diin usa ka buwan ang pinakabata ug 67-anyosd ang pinaka-edaran. Sa 34 ka mga natalang kaso, 4 niini ang gikan sa Agusan del Norte partikular na sa lungsod sa Santiago nga adunay 3, ug usa sa Kitcharao.
Nadungagan usab og tulo ang Cabadbaran City nga nabahin sa Barangay 12, Comagascas ug Katugasan nga pulos adunay tag-usa. Walo ang nalista sa Agusan del Sur partikular na sa lungsod sa Loreto nga adunay 7 ug usa sa Prosperidad samtang duha usab ang natala sa Dapa, Surigao del Norte.
Mas ubos og dyutay ang natala karon nga mga bag-ong kaso dinhi dakbayan sa Butuan nga anaa lamang sa 17 kansa nabahin sa Barangay Libertad ug Villa Kanangga nga adunay tag-tulo, samtang duha sa San Vicente ug tag-usa ka mga dugang kaso sa Agao, Ambago, Ampayon, Bayanihan, Doongan, Fort Poyohon, Golden Ribbon, Maon, ug Pigdaulan. Sumala sa ahensya, sa maong mga kaso 18 ang asymptomatic kon walay gihambing simtomas sa sakit samtang 16 ang adunay mild symptoms.
Gipa-ilalom na sa kwarantina ang 34 ka mga natahong kaso ug nagsunod na sa mga health protocols.
Sa pagkakaron, ang kinatibuk-ang cumulative confirmed COVID-19 cases sa Caraga region, miabot na sa 2,225 diin sa maong ihap 778 ang mga active cases kon kadtong mga nagpaayo pa samtang miabot na usab sa 1,351 ang nga recoveries ug nagpabilin sa 96 ang mga namatay.
